विश्वकपमा चम्किएका नयाँ ताराहरू

विश्वकप फुटबल प्रतियोगिता विश्वकै ध्यान खिच्ने एउटा यस्तो महाकुम्भ हो, जहाँ उदीयमान युवा खेलाडीहरूका लागि आफ्नो क्षमता प्रदर्शन गर्ने ठूलो अवसर प्राप्त हुन्छ। यस विश्वकपमा पनि केही यस्ता प्रभावशाली र प्रतिभाशाली युवा खेलाडीहरूले आफ्नो खेलका माध्यमबाट विश्व फुटबलमा शक्तिशाली आगमनको स्पष्ट सङ्केत दिएका छन्।

१. किलियन एमबापे (फ्रान्स, १९ वर्ष)

फ्रान्सका १९ वर्षीय किशोर खेलाडी किलियन एमबापे अर्जेन्टिनाविरुद्धको खेलमा गरेको उत्कृष्ट प्रदर्शनका कारण रातारात सबैका प्रिय बने। फ्रान्सले ४–३ ले जितेको उक्त रोमान्चक भिडन्तमा एमबापेको तीव्र गतिसामु अर्जेन्टिनाको डिफेन्स पूर्ण रूपमा छिन्नभिन्न बनेको थियो। सो खेलमा उनले दुई गोल गर्नुका साथै टोलीका लागि एक पेनाल्टीसमेत सिर्जना गरेका थिए।

हाल पेरिस सेन्ट जर्मेन (PSG) बाट खेलिरहेका एमबापे विश्वकै दोस्रो महँगा खेलाडी बनिसकेका छन् (जसमा पहिलो स्थानमा नेमार रहेका छन्)। फुटबल विश्लेषकहरूले भविष्यमा एमबापेबाट अझ धेरै जादूगरी खेलको अपेक्षा गरेका छन्।

२. बेन्जामिन पवार्ड (फ्रान्स, २२ वर्ष)

जर्मन बुन्डेसलिगा क्लब स्टुटगार्टबाट खेल्ने फ्रान्सका राइट ब्याक बेन्जामिन पवार्डले अर्जेन्टिनाविरुद्ध हाफ-भलीमा गरेको दर्शनीय गोल यस विश्वकपको अविस्मरणीय क्षणमध्ये एक बन्यो। सन् १९९८ को विश्वकपमा लिलियन थुरामपछि विश्वकपमा गोल गर्ने उनी फ्रान्सका पहिलो डिफेन्डर हुन्।

फ्रान्सेली क्लब लिलेका उत्पादन पवार्ड सन् २०१६ मा जर्मनी जानुअघि लिलेमै आबद्ध थिए। जारी विश्वकपमा उनीद्वारा गरिएको उत्कृष्ट प्रदर्शनका कारण म्यानचेस्टर सिटी, टोटेनहाम र बायर्न म्युनिखजस्ता ठूला क्लबहरू उनलाई आफ्नो टोलीमा भित्र्याउन होडबाजी गरिरहेका छन्।

३. अलेक्ज्यान्डर गोलोभिन (रुस, २२ वर्ष)

आयोजक रुसका २५ वर्षीय मिडफिल्डर अलेक्ज्यान्डर गोलोभिनले प्रतियोगिताको उद्घाटन खेलमा साउदी अरबविरुद्ध फ्रिकिकमार्फत गरेको सनसनीपूर्ण गोल धेरैको मनमा ताजै छ। सोही खेलमा उनले दुईवटा गोलका लागि उत्कृष्ट पास (असिस्ट) समेत मिलाएका थिए।

उद्घाटन खेलको सो प्रदर्शनलगत्तै चेल्सीले उनलाई २ करोड ७० लाख पाउन्डमा भित्र्याउने चर्चा चलेको थियो भने आर्सनल र इटालीको युभेन्टस्ले पनि उनलाई आफ्नो टिममा समावेश गर्न तीव्र इच्छा देखाएका छन्।

४. हर्भिङ लोजानो (मेक्सिको, २२ वर्ष)

मेक्सिकोको क्लब पाचुकाबाट नेदरल्यान्ड्सको PSV मा स्थानान्तरण भएको एक वर्षमै हर्भिङ लोजानोको खेल जीवनले यस विश्वकपबाट ठूलो छलाङ मारेको छ। डिफेन्डिङ च्याम्पियन जर्मनीविरुद्धको खेलमा मेक्सिकोका लागि निर्णायक गोल गर्दै लोजानोले विश्वभरि आफ्नो गहिरो छाप छोडे।

यी प्रतिभाशाली विङ्गरलाई टोलीमा ल्याउन बार्सिलोना, युभेन्टस्, आर्सनल र इभर्टनजस्ता युरोपेली हस्तीहरूले चासो देखाएका छन्। यसको प्रत्यक्ष फाइदा उनको क्लब PSV ले उठाउने पक्का छ, जसले लोजानोको ट्रान्सफरका लागि कम्तीमा ४ करोड युरो माग गर्ने बताइएको छ।

५. जोर्डन पिकफर्ड (इङ्ल्यान्ड, २४ वर्ष)

इभर्टनका गोलरक्षक जोर्डन पिकफर्डले यस विश्वकपमा इङ्ल्यान्डको गोलरक्षकको साख र छवि निकै उकासेका छन्। प्रतियोगिताभर उनले कुल १५ वटा उत्कृष्ट बचाउ (सेभ) गरे।

विशेष गरी कोलम्बियाविरुद्धको पेनाल्टी सुटआउटमा पिकफर्डले देखाएको अद्वितीय बचाउकै मद्दतले इङ्ल्यान्ड क्वाटरफाइनलको यात्रा तय गर्न सफल भएको थियो।